Нырысетӥ юан удмуртъёслэн сяме пырем шулдыръяськонзылы сӥземын вал. Жаляса верано, коронавирусэн йырин, малпам ужрад воштӥськиз. Соин йӧскалык политикая министерство вазиськонэн потӥз «Гербер» интые гудырикошконэ «Выль» праздникез ортчытоно шуыса. Ужрадэ ӧтьыны ӵекто мукет калыкъёсты но. Уго таӵе кылдэм югдыр улсын бигеръёслэн но «Сабантуй» шулдыръяськонзы уз ортчы, поръёслэн но «Семык» праздниксы уз радъяськы.

Кенешчиос мылкыдзэс веразы праздникын мукет калыкъёс понна площадкаос ужазы ке но, шулдыръяськон удмурт шӧмо кыльыны кулэ, калыккуспо фестивальлы пӧрмыны кулэ ӧвӧл шуыса. «Выль» – со удмуртъёслэн быгыльскем емышез, бакча сиёнэз веръянлы сӥзем вашкала праздниксы. Соин ик шулдыръяськон удмурт лулчеберетэн, удмурт йылолъёсын герӟаськемын кулэ луыны.

– Шулдыръяськон Удмуртилэн кунлыкезлы 100 ар тырмонэз пусъён улсын ортчоз, соин нокинэ но палэнэ кельтыны уг яра. Но удмуртлыкез отын яркытгес возьматыны быгатыны кулэ, – пусйиз «Айкай» театрлэн кивалтӥсез Пётр Данилов.

Куартолэзе Пичи Пурга ёросысь Баграш Биграгуртын ортчыны кулэ вал удмурт нылкышноослэн бадӟым ужрадзы но. Со «Удмурт нылкышно кенеш» огазеяськонлэн отчетно-выборной конференциез но удмурт нылкышноослэн нырысетӥ ӧтчамзы дырысен 100 тырмонлы сӥзем конференция. Ужрад табере ортчытыны чакламын 24-тӥ куарусёнэ. Конференциын нылкышно движенилы сӥземын докладъёс чузъяськозы. Ашальчи Оки нимо йӧскалык премилэсь лауреатъёссэ сӥлы карозы. Туэ данъетэз басьтозы Россия Федерациысь дано артистка Валентина Пудова, дышетон удысысь сиё-дано ужась, «Удмурт Кенешлэн» Сарапул ёросысь ёзэтэзлэн кивалтӥсез Нина Бехметова но профессор Ева Тулуз. Озьы ик «Удмурт нылкышно кенешлэн» берло ньыль ар ӵоже ужамезлы йылпумъянъёс лэсьтозы но огазеяськонлы выль тӧро быръёзы.

Туннэ нуналлы тодмо луиз Финн-угор калыкъёслэн дунневыл конгрессы вуоно гужемлы выжтэмын шуыса. Туэ со инвожо толэзе Эстониын ортчыны кулэ вал. «Удмурт Кенеш» огазеяськемлэн Тӧроез Татьяна Ишматовалэн верамезъя, конгресслэн воштӥськонъёсыз уз луэ. Темаез но, программаез но озьы ик кельтэмын. Ужрад Эстониын ик радъяськоз.

Воштӥськонъёстэк ортчыны кулэ вань удмуртъёслэн 14-тӥез ӧтчамзы. Со толсур кутсконэ чакламын.

– Со дырозь котькуд ёросын ортчыны кулэ йылпумънъёс лэсьтонъя но кивалтисьёсты быръёнъя конференциос. Отын ик съездэ быръемын луыны кулэ делегатъёс, – шуэ Татьяна Ишматова.

Та дыре калыкез сюлмаськыто удмурт кылын потӥсь теле но радио программаос. Гужеме потӥськом бере, солы тросгес саклык висъяське. Кызьы ужалоз та дыре удмурт телерадиокомпанимы, кыӵе выль передачаос потозы, кыӵе луоз вещаниез. Компанилэн али но гужем ужан радлыкеныз кенешчиосты тодматӥз «Мынам Удмуртие» телерадиокомпаниысь валтӥсь редакторезлэн воштӥсез Сергей Касаткин.

– Али зэм но туж кысык вакыт, малы ке шуоно элькунамы потаны сюрес ворсаськемын. Куное но али дыре нокинэ ум ӧтчаське, – шуиз со. – Соин ик тани таӵе амалэн, видеоконференция пыр, гуртын тыршисьёсын вераськиськом. Журналистъёс уже куто скайп но телефон пыр ыстэм интервьюосты но видеоосты. Оскиськом, инвожоысен куноосмы луозы ини, авторской программаос берытскозы.

Вераны кулэ на, «Культура» йӧскалык ӵектос улсын «Моя Удмуртия» телерадиокомпания Удмуртиысь йӧскалык театрлэсь удмурт кылын спектакльёссэ сӥзьылысен возьматыны кутскоз. Съёмкаосты инвожо пумын – пӧсьтолэзь кутсконын ортчытыны малпало вал. Али югдырез лыдэ басьтыса, валамон ӧвӧл на кыӵе вакытэ соос ортчозы. Но чаклам ужез быдэстыны могӟетъёс уз луэ, дыр, шуиз Сергей Касаткин. Озьы ик «Айкай» театрлэн сӥзьыл ортчоно юбилейной концертэз но телеканал пыр возьматэмын луоз.

Кенешонлэн пумаз люкаськемъёс буре ваизы улонысь кошкем адямиосты. История наукаосъя докторез, Удмурт Элькунысь наука удысысь дано ужасез Маргарита Григорьевна Ивановаез но тодмо политикез, сенаторез, «Справедливая Россия» партилэн Удмуртиысь ёзэныз азьвыл кивалтӥсез Виктор Евграфович Шудеговез.