Сӥё-дано ужрадэ пыриськизы «Удмурт Кенеш» огазеяськонлэн Тӧроез Татьяна Ишматова, ёросысь кивалтӥсьёс, гуртоос, дышетскисьёс но журналистъёс.

Котькудӥз пусйиз Николай Вахрушев «Удмуртилэн уйпал уӵыез» шуыса. Ачиз но Николай Дмитриевич шуэ вылэм: «Удмурт кырӟанъёсты мон огшоры уг кырӟаськы. Кылъёс котьку сюлмы пушкысь пото».

Николай Вахрушев артистъёс пӧлын висъяськылӥз аслаз баритон куараеныз. Со кырӟаз «Италмас» ансамбльын. Яратӥз быдэсъяны вордскем шаерез сярысь, яратон сярысь кырӟанъёсты, романсъёсты, арияосты. Солэн репертуараз Г.А.Корепановлэн, Г.М.Корепанов-Камскийлэн, Н.М.Греховодовлэн, Г.Н.Матвеевлэн, Е.В.Копысовалэн, Ю.В.Болденковлэн гуръёссыя кырӟанъёс.

Николай Вахрушевлы буре ваён пул лэсьтэмын вал Удмуртилэн кунлыкезлы 100 ар тырмонлы сӥзьыса, «Удмурт Кенеш» огазеяськонлэн киӵӧлтэмезъя но Йӧскалык политикая министерство юртэмъя.