Люкаськем калык азьын нырысь ик вераськиз Яр ёрос администрацилэн кивалтӥсезлэн мерлык ужпумъёсъя воштӥсез Надежда Несмелова. Собере Флор Васильевлэн кылбур чуръёсыныз азинтӥз пумиськонэз «Удмурт Кенеш» огазеяськонлэн Яр ёросысь ёзэтэзлэн кивалтӥсез Ольга Барышникова.

Ужрадэ озьы ик пыриськизы Бадӟымгурт школаын дышетскись нылпиос: Ксенья Баженова, Инесса Трефилова, Игнат Вершинин, Кирилл Золотарев. Соос улосчизылэсь пӧртэм аръёсы гожтэм кылбуръёссэ лыдӟизы.

Ужрад йылпумьяськиз сяська пононэн.

Флор Васильев шаерысьтымы одӥгез тужгес но тодмо поэт. Вордӥськиз со Яр ёросысь Бердыш гуртын. Берлогес кылбурчи аслэсьтыз дорзэ «Мынам столицае – Бердыш» шуыса нимаз. Сизьым классэз Укан черкогуртын йылпумъяз, 1948-тӥ арын Глазкарысь педучилищее пыриз. Татын со выль адямиосын тодматскиз, ёрослэн мерлыко улоназ пыриськиз, кылбуръёс гожъяны ӧдъяз. Солэн кылбуръёсыз болгар, венгер, латыш, украин, бигер, чуваш, якут, коми но мукет кылъёсы берыктэмын, ужъёсыныз Москваын но Ижын бичетъёс поттэмын. Удмурт кылын 7 кылбур сборникез, ӟуч кылын — 5-ез печатламын.