Шальк-шальк воргорон командаос арлыдзэс, йӧно луэмзэс вунэтыса, ӵужонэн уйылӥськизы туп сьӧры. Эсьмаса тузон (ой!) лымы ик пурӟиз котыр. Нылкышноос нош куаш! поттыса учкизы, «висизы».

Спортплощадкалэсь палэнынгес чильым кыскись песятай сямен лумбыт ӵындӥз питранъёс вылэ пуктэм гур: пӧсь табань, ӝук но турын-куарлэсь чай татын ческытлэсь но ческыт кошкизы. Мылкыд кырӟаз-поръяз, пурысь инбам но сое куашкатыны ӧз быгаты. Зэмос праздниклы пӧрмиз нунал.

Атыкай музъеммес утисьёслэн праздниксылы но спортъя элькун гурт шудонъёслы сӥзем ӵужонболъя ёрос ӵошатсконъёсы пыриськизы Каменной Ключысь, Уёысь, Кионысь, Вавожысь, Волиысь, Ӟамбайысь, Биялась, Водӟиысь но Мӧннялась (Брызгалась) командаос. Дорын, пе, боддоръёс но юртто: вормисе потӥзы кузёос. Соос мынозы Удмурт театре «Васьлей» спектакль учкыны. Дунтэк билетъёс висъямез понна, тау шуиськом Йӧскалык кун театрлэн кивалтӥсезлы А.И. Ураськинлы. Кыкетӥ луизы «Кион батыръёс», нош куинетӥ интыез люкизы вавожъёс но Каменнойысь «Пионер пельняньёс». Нош Брызгал секторлэн кивалтӥсезлэн Виктор Кислицинлэн нимысьтыз висъям призэз «кошкиз» Каменнойе — Виктор Обухов вань шудӥсьёслэсь мӧйы ке но вал, туж етӥз бызьылӥз-шудӥз.

«Удмурт Кенешлэн» Вавож ёросысь ёзэтэныз ялэм бадӟым ужрадэз рос-прос ортчытӥзы но шуныт пумитазы куноосты мӧнняос но брызгалъёс. «Кин шудэ ӵужонболэн, со уг висьы ковидэн!», «Асьмеос ӧм ке сюлмаське улонмес тунсыкогес карыны, кин сюлмаськоз?», «Шудэмъя шудэм потэ!», «Телевизор азьын пукытозь, эсьмаса тазьы шутэтскод — пайдаез тросгес», — мылкыдъёссэс веразы шудӥсьёс.