Ужрадэ пыриськизы Ольга Анатольевналэн ӵыжы-выжыосыз, ӵош ужам эшъёсыз, матысь адямиосыз, гуртоосыз, литература удысын тыршисьёс, журналистъёс, дышетӥсьёс но студентъёс. Ӧтем куноос Ольга Ведрова сярысь трос выльзэ но тунсыкозэ веразы. Ваньмыз ик пусйизы солэсь муш кадь ужаны быгатэмзэ, котьку капчи мылкыдо но лякыт сямо луэмзэ, кыланы-вераны быгатэмзэ.

Ольга Анатольевнаез ӟечкыланы вуылӥзы «Удмурт Кенешлэн» вице-президентэз Елена Ленцова, Ижкарысь Индустри ёрос кенешлэн кивалтӥсез Галина Эскандерова но огазеяськонмылэн ёзчиосыз. Со уго туж гажамон кенешчимы но луэ. Ас вакытаз Ольга Ведрова кивалтӥз Ижкарысь Индустри ёрос ёзэтэнымы, нош 2013-тӥ арын удмурт журналистикаез азинтэмез понна Эрик Батуев нимо йӧскалык премиен пусъемын вал.