Зинаида Титова вань улонзэ Пичи Пурга ёросысь «Маяк» газетын ужамын, озьы ик кема аръёс ӵоже кивалтэмын литература творчествоя «Пурга гуръёс» огазеяськонэн. Кызьы исполкомчиос пусйизы, со огазеяськон гожъяськисьёсты но кылбурчиосты будэтонъя зэмос центрлы пӧрмытэмын вал. «Сыӵе огазеяськон нокытын но ӧй вал, со сыӵе аспӧртэм феномен кадь, кудӥз пумен элькун уровене потӥз» — вераз йӧскалык премиосъя комиссилэн ёзчиез Елена Миннигараева.

Зинаида Яковлевна юнкоръёсын ужамын аслыз дан поттытэк, аслаз мылкыдыз вылын. Солэн дышетэм пиналъёсыз туннэ нуналлы луэмын ини туж тодмо адямиос — корреспондентъёс, журналистъёс, гожъяськисьёс, кылбурчиос, тодосчиос.

Тодады вайытом, толон йӧскалык премиосъя комиссимы люкаськылӥз. Зинаида Яковлевналэсь кандидатуразэ солэн ёзчиосыз ӵектӥзы. Исполкомчиос лауреат понна огкылысь дурбасьтӥзы. Данъян ужрад ортчоз 8-тӥ оштолэзе Ашальчи Окилы тупатэм ужрад улсын.