Али дыре дасяськиськом 2-тӥ оштолэзе Бадӟым удмурт диктантэз гожтыны. Татьяна Витальевна пусйиз, акцие пыриськон – со анай кылдэ гажан но яратон. Соин ик та ужрадэ тросгес удмурт калыкез кыскыны тыршоно шуиз. Ёзчиосмы диктантэз гожтыны котькуд каръёсын но ёросъёсын быгатозы, нош Ижкарысь кенешчиосмы понна нимысьтыз площадка ужалоз Калыкъёслэн эшъяськон юртазы.

Эшшо одӥгез бадӟым ужрад — Финн-угор нылкышноослэн улосвылкуспо форумзы. Ужрад тупатэмын нырысетӥ удмурт нылкышно кылбурчилэн Ашальчи Окилэн вордскем нуналэзлы. Со ортчоз 8-тӥ оштолэзе Алнаш ёросысь Улын Сыръезь гуртын. Ужрадэ удмурт, пор, мордва, бесерман кышномуртъёс пыриськозы. Удмуртиысь сяна, делегациос вуозы Татарстанысь, Башкортостанысь но Пермь улосвылысь. Та нуналэ ик сӥё-дано сётэмын луоз Ашальчи Оки нимо йӧскалык премия.

Тулыс вуэмен, тани-тани веме ужъёс кутскозы. Кенешим, субботникъёс радъяськыку, ошмесъёсты но палэнэ кельтоно ӧвӧл шуыса, уго ошмесысен кутске шур но, гуртысь улон но. Соин ик ялӥмы «Ошмесо шаере» нимо выль проект-марафон. Со улсын азьветлӥсьёсмы дышетскись пиналъёсын, гуртоосынызы ӵош ошмесъёсты сузялозы-утялтозы, соослэсь лыдзэс чаклалозы.

Азьпалан озьы ик Быдӟым Вормонлы сӥзем ужрадъёс, Россилэсь нуналзэ сӥё-дано пусъён, «Гербер» шулдыръяськонэз радъян. Котькудӥз ужрад рос-прос дасяськонэз кулэ каре. Оскиськом, огъя кужымен ваньзэ вормом шуыса.