Эмезь кисьман вакытэ….

Куазь ӵукна ке луэ, эмезян мынӥсько,
Горд кисьмам эмезез дурыныз бичасько.
Куазь пеймыт ке луэ, малпаськын кутскисько,
Горд кисьмам эмезь кадь ик кылбур гожтӥсько.

Вож эмезь нюлэскын туж уно ӝужамын –
Шундыед ке луиз, со луоз кисьмамын…
Нюлэскын кисьмано эмезьлэсь но уно
Мынам вань на сюлмам гожтоно кылбуръёс…
Ку медам ӝужалоз бен мынам шундые?
(Ашальчи Оки)